dimecres, 3 de maig de 2017

Unu e sete - Gianni Rodari





 Unu e sete

Apo connotu unu pitzinnu chi fiat sete pitzinnos. Istaiat in Nùgoro, si naraiat Pàulu e su babbu fiat autista.
Ma istaiat fintzas in Parigi, si naraiat Jean e su babbu traballaiat in una fàbrica de veturas.
Ma istaiat fintzas in Berlinu, si naraiat Kurt, e su babbu fiat professore de violontzellu.
Ma istaiat fintzas in Mosca, si naraiat Juri, comente Gagarin, e su babbu fiat fraigamuru e istudiaiat matemàtica.
Ma istaiat fintzas in Nova York, si naraiat Jimmy e su babbu teniat unu distribuidore de benzina.
Cantos nd'apo naradu? Chimbe. Nde fartant duos: unu si naraiat Ciù, istaiat in Shangai e su babbu fiat piscadore; s'ùrtimu si naraiat Pablo, istaiat in Buenos Aires e su babbu fiat pintore.
Paolo, Jean, Kurt, Juri, Jimmy, Ciù e Pablo fiant sete, ma fiant semper su matessi pitzinnu chi teniat oto annos, ischiat giai lèghere e iscrìere e andaiat in bitzicleta sena pònnere sas manos in su manùbriu.
Paolo fiat mùrinu, Jean brundu, Kurt castàngiu, ma fiant su matessi pitzinnu. Juri teniat sa pedde bianca, Ciù sa pedde groga, ma fiant su matessi pitzinnu. Pablo bidiat sos films in ispagnolu e Jimmy in inglesu, ma fiant su matessi pitzinnu, e riiant in sa matessi limba.

Como so sete pitzinnos sunt crèschidos, e no ant a fàghere prus sa gherra intre issos, ca sos sete sunt unu solu òmine.

Cap comentari:

Publica un comentari a l'entrada