diumenge, 30 d’octubre de 2016

A su mortu mortu / Pro sas animeddas











"A su mortu mortu" o "Happy Halloween" ?

         Dae unos cantos annos semus assistende, cun su cunsensu mudu de una parte manna de sa populatzione, a s'isparghidura de una “festa” furistera, Halloween, chi non tenet nudda de ite bìdere cun sa cultura nostra. Su chi in àteros logos est su costumadu, in Sardigna est unu machìmene, un'istrallòbiu, unu sciollòriu. Halloween cheret nàrrere: sa note in antis de Totus sos Santos, e in cussa note sos Tzeltas si caratzaiant de animales, imbrutaiant sas domos, poniant in sas ghennas issoro tzuchitas e ossos de animales pro assuconare sos mortos, chi in cussa note torraiant pro chircare de intrare in sa carena de sas pessones bias e pòdere gasi campare un’àteru annu.
         Su costumadu nostru, de Sardigna, in sa prima die de su mese de santandria, est chi a sero, fiotos de pitzinnos andant dae una domo a s’àtera pedende “a su mortu mortu”, o impreende un’àtera fòrmula dipendende dae sa bidda, "pro sas Animeddas" narant in àteros logos, e si lis dant papassinos, mèndula, frùtora, nughe o àteru. Sos pitzinnos non disafiant sos meres de sas domos a lis dare carchi cosa pro sas Animeddas, non minetzant si non bi la dant, ma bi la pedint.
         Sa note, pustis chena, sa famìlia torrat a aparitzare sa mesa, pro un’àtera chena, sa de sos mortos de domo, ca torrant e tocat a los acasagiare. In banca si bi ponet sa chena pro sos mortos e una candela. A sos minores si lis narat de non s’ischidare a de note e de non si nde pesare dae su letu pro no infadare sos mortos.
         Sa famìlia intrea est partìtzipe de custu eventu, de custu ritu de ammentu de sos mortos e de sa morte, de s'arcanu de sa morte, parte de un’àteru arcanu: su de sa vida. Est un'arcanu sa nàschida, sa vida in custu mundu, est un'arcanu s’amore, est un'arcanu sa morte. Sos mortos de domo sunt ànimas bonas, no los timus, non nche los catzamus, los atzetamus, los rispetamus  e los ammentamus. Dae sende criaduras sa morte est presente, s’agonia de su giaju e de sa giaja est parte de sos ammentos nostros, semus intrados cun rispetu in s’aposentu issoro, los amus acumpangiados a s'interru.
         Sas costumàntzias nostras nos definint rispetu a àteras culturas, sunt parte de s’identidade nostra e est cun custas chi nos devimus presentare in custu mundu semper prus globalizadu; non las devimus bìdere comente cosas betzas de nche frunire a su fogu de su consumismu, non devimus èssere ogetu passivu de s’aculturatzione globalizada, presentada comente signu de modernidade, aculturatzione, custa si plastificada, chi est apranende totu e totus.
  A su mortu mortu.



dimecres, 19 d’octubre de 2016

Contigheddos - Xavier Frias Conde




Sara sa pranghijola
           
Sara istaiat semper pranghende sena ischire su proite e sas làgrimas li faliant finas a terra. Una die però, sighende su caminu de sas làgrimas, at iscobertu chi suta de su letu suo unu monstrueddu minudu minudu regolliat totu sas làgrimas suas dae terra e si  faghiat collanas bellas meda, che de  coraddu.           
Sara no at naradu nudda, ma dae sa die, cando pranghiat, no li importaiat meda, ca pensaiat chi cuddu monstrueddu esseret su de sas mìgias e a su mancu sas làgrimas suas lu faghiant cuntentu e de cussa manera s'ismentigaret de li furare sas mìgias.       
Su chi issa non podiat immaginare fiat chi su monstrueddu non fiat su chi si pensaiat issa, ma su de sos bisos malos, e chi  cada note li murmutaiat in s'origra istòrias tristas e feas pro la fàghere a prànghere a de die. E de custa manera, a pustis de fàghere sas collanas, las bendiat e, gràtzias a custu, si fiat faghende ricu meda.                                              


Su monstru de sos macarrones
           
Babbu me', so seguru chi suta de su letu meu b'at unu monstru de sos bisos malos", at naradu  su pipiu. A podes castiare in cue? Deo tèngio timoria ...         
Su babbu, amorosu, si nde fiat pesadu a mesu chenare e fiat andadu a castiare suta de su letu cun una làntia. At abbaidadu bene totu e a pustis at naradu a su fìgiu:
- Fìgiu me', non b'at perunu monstru de sos bisos malos suta de su letu tuo.      
- Seguru nde ses, ba'? Mi paret chi b'at calicunu in cue suta.        
- Eja, ma est unu Tremebundus Devorator Domesticus, no unu de cussos monstruos de sos bisos malos, duncas non tenes nudda a tìmere, ca custa criadura segrestat a sos pipios che tue e los trasformat in macarrones de colores.                                



Duos dragones e unu psicòlogu
           
In su rennu de Cafellàndia duos dragones ispantaiant a sa gente. Perunu cabadderi fiat istadu capatzu de los derrotare. Perunu cabadderi,  de totu sos chi b'aiant lassadu sa vida issoro gherrende contra de sos dragones, chi fiant nessi una chentina; ma totu in unu aco' chi como si nd'ocupaiat su psicòlogu iscolàsticu, Antoni Paràcua, e sa cosa tando at cambiadu de su totu. Isse at contadu a unu dragone chi un'àteru dragone ispantaiat mègius, e a custu dragone imbetzes at naradu chi cuddu àteru dragone brusiaiat mègius sas cosas. Su resultadu est istadu miraculosu. Sos duos dragones si fiant brigados intre issos e  intre issos etotu si fiant brusiados.    
Gràtzias a custa trampa, su rennu como tenet màndigu gratis pro duos o tres annos, e bonu meda, ca sa petza de dragone brusiadu tenet unu sabore chi s'assimìgiat a sa de su puddu arrustidu.                                                



Ernestinu
           
Su monstru Ernestinu si nche fiat tzacadu in domo de Istèvene. Su traballu suo fiat su de ispantare piseddos, ma a isse non si bi fiat pòdidu nemmancu acurtziare. Su monstru no aiat mai sentidu perunu piseddu pudèschere de cussa manera. Ite orrore!    
Duncas, imbetzes de l'ispantare, a de note su monstru at leadu a Istèvene, nche l'at postu in su riu, l'at  sabunadu bene meda cun sabone - mescamente in  sas origras - e nche l'at torradu a domo sua, netu che prata. Sa mama  no at  reconnotu su fìgiu, ca faghiat fintzas nuscu bonu e nche l'at catzadu   dae domo.          
Como Istèvene andat semper fatu a Ernestinu preguntende·li a cada momentu: "Pro ite non m'as ispantadu e lassadu brutu? Pro ite non m'as ispantadu e lassadu brutu?"



Unu  monstru carinnosu

Màriu teniat timoria manna de sos monstruos, ma s'ùnicu logu in ue si sentiat trancuillu e podiat dormire asseliadu fiat in s'aposentu suo. Isse non nd'ischiat sa resone, ma a  nàrrere sa beridade fiat ca totu sas notes su monstru de s'armàriu, mentres isse fiat dormende, li carinnaiat sa conca.  


A su majarzu no lu creet nemos

                Su majarzu prus poderosu de sa Terra Estrema, cussa in  Fundu de totu a Manu manca, at detzisu de s'arrèndere cando at bidu chi fiat impossìbile a cumbìnchere sos massàjos chi su chi isse faghiat fiat majia poderosa e no illusione, comente faghiant sos tzarrolitanos de sas festas. Ma, sigomente non los cumbinchiat, at detzisu de si comporare unu tzircu pro fàghere in cue sas majias suas, ca non cheriat mòrrere de su fàmene.  



Su brùsciu Rudesindu

               Su brùsciu Rudesindu at iscobertu unu sistema infallìbile pro dormire totu su bidda. Si tratat de pònnere un'aneddu lughente in sa coa de unu cane e fàghere passigiare s'animale peri sa bidda movende sa coa. De custa manera, cando sos abitantes de su rennu abbàidant cussu aneddu lughente, unu fatu a s'àteru, abarrant dormidos.      


Sas brùscias andant in vetura?

              Arcàdia fiat una brùscia comente si tocat, a s'antiga.  L'aiant obligada però a non bolare cun s'iscòbulu suo; deviat imbetzes leare sa vetura pro biagiare. Issa però non resessiat a s'avesare, e tando poniat sa vetura a bolare, e issa si nche setziat a subra.       



Su chi faghent sos relogeris

             Una die sa luna si fiat firmada in chelu. E ite fiat sutzessu, unu disastru mannu? Coro meu! Nde deviat rùere su chelu subra de sa terra? Fiat a puntu de comintzare un'assustu mannu ma, totu in unu, unu relogeri, cun un'iscala longa longa e cun un'aina fintzas issa longa longa, est pigadu finas a sa luna. At dadu corda a sa luna, che chi èsseret unu relògiu, cun assèliu, e si nch'est faladu. Luego sa luna est torrada a si mòvere peri su chelu.   


Sa domo de sos naneddos

             Una die, sos òmines aiant regortu belle totu s'antunna de su rennu. Sos naneddos, mischinos, fiant abarrados sena domo pro s'amparare dae s'abba. Tando, sos naneddos, in assemblea, ant detzisu chi issos diant fàghere su matessi a sos òmines: una die totu sas domos de su rennu fiant apartas sena cobertura. Forsis, de custa manera, sos òmines diant cumprèndere carchi cosa.            




Sos sordados narant chi nono

                In sas làcanas de sos tres rennos, sos tres esèrtzitos fiant a puntu de comintzare una batàllia ferotze. Totu in unu, est falada sa nèula e  pro tres dies sighidas at imboligadu sos tres esèrtzitos. Totus  fiant isetende chi sa nèula si nch'andaret, ca non bidiant prus nudda. Cando tres dies a pustis sa nèula s'est artziada, sos tres generales ant chertu comintzare torra sa batàllia, ma sos sordados de sos tres esèrtzitos ant naradu chi nono. Però, sigomente sos generales cheriant tènnere carchi vitòria, ant pòdidu organizare petzi una cursa de tapos de ampulla.  



Sa gherra de sos istùrridos

            S'esèrtzitu invasore fiat compostu de sordados chi non teniant timòria de nudda o, a su mancu, gasi pariat. Pro sorte manna sua,  sa gente at iscobertu chi sos sordados invasores timiant sos istùrridos. Pro custu est chi  su re at cumandadu a totu sa populatzione de ghetare piberone in s'aera. Totu sa bidda at incumentzadu a isturridare, e sunt resèssidos a istransire una invasione furistera. Aciiisss! Salude!   


Tzarrende in internet

                Su cabadderi catza-dragones Ferdinandu Alavirulè est abbarradu pedrale cando at iscobertu chi a in segus de cuddu "nick" de «Baddarinu drangallone», cun su cale passaiat tantas e tantas oras   tzarrende in s'internet, si cuaiat su dragone catza-cabadderis Alenu Putzinosu de Inferru.     



Una printzesa rockera

               Sa printzesa s'est negada a si cojuare cun su cabadderi arrogante e imbelèschidu, ca a issa li agradaiant sos giòvanos balentes. Duncas, sa printzesa si nch'est fuida cun unu brùsciu rockeru chi aiat connotu in sas pàginas de s'internet e chi li praghiat a s'arrabbiare cun sos dragones.    



Su lupu at cambiadu traballu


                Sigomente non resessiat a fàghere leare timòria a nemos, su lupu ferotze s'at chircadu un'àteru traballu. Como est unu brullanu etzellente e sa gente, sos porcheddos e fintzas sos cabriteddos si nche morint dae su risu cun sas brullas suas.   




Carreras chi iscumparint

- E ite nde pensas de cudda tontesa chi creet gente meda, chi sas carreras, nant chi, si nch'andant a de note? - preguntat un'òmine a un'àteru.       
- Tontesas, eja, non sunt àteru che tontesas  ... - rispondet s'àteru 
Unas cantas  oras a pustis però, cando totus sunt giai dormende e nemos si nd'abìgiat, sas carreras de sa tzidade  iscumparint, si nch'andant bolende, ca nemos diat pòdere immaginare chi sas carreras de sa tzidade sunt in realidade carenas de dragone allogadas dae su sìndigu, unu brùsciu chi s'òcupat de polìtica.                                    



Su monstru de sas mìgias
           
Adalberto fiat istracu de comporare mìgias totu sas chidas. Fiat cumbintu chi teniat unu monstru de sas mìgias in domo, ma sigomente custos monstruos sunt invisìbiles, no ischiat comente fàghere pro nche lu catzare a foras de domo.
Tando, isse etotu at incumentzadu a si mandigare sas mìgias suas. Las comporaiat e si las papaiat. E de custa manera fiat resèssidu a nche catzare dae domo sua su monstru de sas mìgias, ca fiat morende de su fàmene.                                   


Su dragone e su dotore

Su dragone sanguinàriu fiat andadu a su dotore pro cumprèndere pro ite semper li faghiat male meda sa matza a pustis de si nche mandigare una baca intrea. Su dotore, un'omineddu minudu ma sèriu meda, l'at castiadu sa buca, sas dentes, sa limba e su nasu. Acabada sa vìsita, teniat giai sa diàgnosi belle fata:      
- Su problema tuo, dragoneddu meu, est chi t'ant fatu a crèere chi ses unu dragone areste de su totu, e chi depes mandigare petza ebbia, ma a nàrrere sa beridade tue ses unu dragone erbìvoru, e custu non ti l'aiat naradu nemos. Duncas, a comintzare dae oe as a mandigare erba ebbia.    
E dae cussa die, su dragone si fiat postu a mandigare s'erba de sas tancas paris cun sas bacas, e mai prus s'at mandigadu una de custas. Su chi nemos ischit est si at comintzadu fintzas isse a dare late.                                                 
  

Gatos in domo
           
- Non cumprendo pro ite sa domo nostra est totu prena de pilos de gatu, sende chi nois non tenimus perunu gatu. Comente est possìbile? - Naraiat sa mama arrenegada.        
Sa fìgia tando at pensadu chi nde la deviat acabare de dare su màndigu de sos gatos a sa sùrbile chi teniat suta de su letu, ca comintzaiat a tènnere sos matessi problemas de sos gatos.                                              



Su pitzinnu cheret giogare
           
Su pitzinnu fiat abbaidende dae sa ventana. Totu in unu at preguntadu a sa mama:         
- Oh  ma', chèrgio un'alipedde pro tènnere in domo.       
- Ma fìgiu me', cun sos alipeddes non si bi podet giogare.            
Su pipiu at torradu a castiare cussa sùrbile chi fiat acabende de sùere su sàmbene de una baca grassa meda e at pensadu chi forsis sa mama non teniat resone e chi  a un'animaleddu che cussu si li podiat dare a mandigare sutzu de pumata.                                                 


           
Ite sutzedit pro cùrrere tropu.

Sa brùscia Alicarda non podiat cumprèndere comente fiant resèssidos sos politziotos a l'imbiare una multa pro etzessu de velotzidade a domo sua. Ma issa fiat in cue, retratada in sa fotografia a caddu de un'iscòbulu currende in s'autostrada a chentuchimbanta chilòmetros a s'ora. Ma abbaidende cun prus atentzione at iscobertu pro ite sos politziotos fiant istados capatzos de li mandare sa multa: s'iscòbulu suo teniat sa targa.